၂၀၂၆ ကမ္ဘာ့ဖလားရဲ့ ရွှေဖိနပ်ဆုလုပွဲ ကတော့ မက်ဆီ၊ အမ်ဘာပေး၊ ဟာလန်းနဲ့ ဟယ်ရီကိန်း တို့ရဲ့ အားပြိုင်မှုနဲ့အတူ အစောပိုင်းမှာတင် တကယ့်ကို အရှိန်အဟုန် ပြင်းထန်လို့နေပါပြီ။
အင်္ဂလန် အသင်းခေါင်းဆောင် ဟယ်ရီကိန်းက ခရိုအေးရှားနဲ့ ပွဲမှာ နှစ်ဂိုး သွင်းယူနိုင်ခဲ့ပြီးနောက် မှာတော့ အမ်ဘာပေး၊ ဟာလန်းနဲ့ မက်ဆီတို့ရဲ့ ပြိုင်ပွဲအစ ခြေစွမ်းပြ ဂိုးသွင်းယူမှုတွေကို ကြည့်ပြီး သူလည်း အားကျစိတ်နဲ့ တွန်းအားတွေ ရခဲ့တယ်လို့ ဖွင့်ဟလာခဲ့ပါတယ်။ ဒါးလက်စ်မှာ ကစားခဲ့တဲ့ အဲဒီပွဲစဉ်မှာ အင်္ဂလန် အသင်းဟာ ခရိုအေးရှားကို ၄-၂ ဂိုးနဲ့ အကြိတ်အနယ် အနိုင်ယူပြီး အုပ်စု (L) ကို ဦးဆောင်နိုင်ခဲ့တာပါ။ ဟယ်ရီကိန်းက ပထမပိုင်းမှာတင် အင်္ဂလန်အတွက် နှစ်ဂိုး သွင်းပေးခဲ့ပေမယ့် ခရိုအေးရှား ကလည်း ချက်ချင်း အမီလိုက်နိုင်ခဲ့လို့ ပွဲက တကယ့်ကို ရင်ခုန်စရာ ကောင်းခဲ့ပါတယ်။ ဒါပေမယ့် ဒုတိယပိုင်း မှာတော့ အင်္ဂလန်က ကစားဟန် ပိုကောင်းလာပြီး ဂျူ့ဒ် ဘယ်လင်ဟမ်နဲ့ မားကပ်စ် ရက်ရှ်ဖို့ဒ် တို့ရဲ့ ဂိုးတွေနဲ့အတူ ၃ မှတ် အပြည့် ရယူနိုင်ခဲ့တာ ဖြစ်ပါတယ်။
ဒေးဗစ် ဘက်ခမ်း နဲ့ ဂယ်ရီ လိုင်နီကာ တို့ရဲ့ စံချိန်တွေကို လိုက်မှီခဲ့တဲ့ ဟယ်ရီကိန်း
ဒီပွဲမှာ ဟယ်ရီကိန်း သွင်းယူခဲ့တဲ့ နှစ်ဂိုး (ပယ်နယ်တီ တစ်လုံးနဲ့ ဒီကလန် ရိုက်စ်ရဲ့ ထောင့်ကန်ဘော ကနေ ခေါင်းတိုက်သွင်းခဲ့တဲ့ဂိုး) ကြောင့် သူဟာ အင်္ဂလန် ဘောလုံးသမိုင်းမှာ ထူးခြားတဲ့ စံချိန်တွေကို ပိုင်ဆိုင်သွားခဲ့ပါတယ်။ ကိန်းဟာ ကမ္ဘာ့ဖလား သုံးကြိမ် (၂၀၁၈၊ ၂၀၂၂၊ ၂၀၂၆) ဇာတ်တိုက် ဂိုးသွင်းနိုင်တဲ့ ဒုတိယမြောက် အင်္ဂလန်ကစားသမား ဖြစ်လာခဲ့ပြီး ဒါဟာ ဒေးဗစ် ဘက်ခမ်း ပြီးနောက် ဒုတိယမြောက် ကစားသမား ဖြစ်ခဲ့ပါတယ်။ ဘက်ခမ်းဟာ ၁၉၉၈၊ ၂၀၀၂၊ ၂၀၀၆ တို့မှာ သွင်းယူခဲ့တာပါ။ နောက်ပြီး ကိန်းက ကမ္ဘာ့ဖလား ပြိုင်ပွဲတွေမှာ အင်္ဂလန် အတွက် ဂိုးအများဆုံး သွင်းယူပေးထားတဲ့ ဂယ်ရီ လိုင်နီကာရဲ့ ၁၀ ဂိုးစံချိန် (၂၀၁၈ မှာ ၆ ဂိုး၊ ၂၀၂၂ မှာ ၂ ဂိုး၊ ၂၀၂၆ မှာ ၂ ဂိုး) ကိုလည်း လိုက်မှီသွားခဲ့ပြီ ဖြစ်ပါတယ်။
စူပါစတားတွေရဲ့ ပြိုင်ဆိုင်မှုက ပေးတဲ့ တွန်းအား
ပွဲအပြီးမှာတော့ ရှေ့ရက်က ကစားသွားခဲ့တဲ့ တခြား စူပါစတားတွေရဲ့ အံ့မခန်း ခြေစွမ်းပြမှုတွေက သူ့ကို စိတ်ဓာတ်ပိုင်းဆိုင်ရာ လှုံ့ဆော်မှု ပေးခဲ့သလားလို့ မေးမြန်းခဲ့ကြပါတယ်။ ပြီးခဲ့တဲ့ ပွဲစဉ်တွေမှာ အမ်ဘာပေးက ဆီနီဂေါကို ၃-၁ နဲ့ အနိုင်ရတဲ့ ပွဲမှာ နှစ်ဂိုး သွင်းပြီး ပြင်သစ်ရဲ့ ဂိုးသွင်း အများဆုံး ကစားသမား ဖြစ်လာခဲ့သလို၊ ဟာလန်း ကလည်း အီရတ်ကို ၄-၁ နဲ့ နိုင်တဲ့ပွဲမှာ နှစ်ဂိုးသွင်းပြီး နိုင်ငံတကာ ပွဲစဉ် ၁၁ ပွဲ ဆက်တိုက် ဂိုးသွင်းစံချိန်ကို ဆွဲဆန့်ခဲ့ပါတယ်။ ဒါပေမယ့် အားလုံးထက် ပိုကြမ်း ပိုလန်းခဲ့တာ ကတော့ အသက် ၃၈ နှစ် အရွယ် မက်ဆီ ဖြစ်ပြီး၊ အယ်လ်ဂျီးရီးယားကို ၃-၀ နဲ့ နိုင်တဲ့ ပွဲမှာ ဟက်ထရစ် သွင်းကာ ကမ္ဘာ့ဖလား သမိုင်းတစ်လျှောက် အသက်အကြီးဆုံး ဟက်ထရစ်ရှင် ဖြစ်လာခဲ့သလို မီရိုဆလပ် ကလိုဆေးရဲ့ ကမ္ဘာ့ဖလား ၁၆ ဂိုး စံချိန်ကိုပါ လိုက်မှီသွားခဲ့ပါတယ်။
ဒီလို ကမ္ဘာ့ဖလားမှာ စူပါစတားတွေနဲ့ အပြိုင် ခြေစွမ်းပြချင်တဲ့စိတ်နဲ့ ပတ်သက်ပြီး ဟယ်ရီကိန်းက အခုလို ဝန်ခံခဲ့ပါတယ်။ “တခြားသူတွေ ဂိုးတွေသွင်းနေတာကို ကျွန်တော် မြင်ပါတယ်။ တကယ်တော့ ကျွန်တော်က တခြားသူတွေ အပေါ် သိပ်ပြီး အာရုံမစိုက်ချင်ပါဘူး။ ဒါပေမယ့် အားကစားသမား တစ်ယောက် အနေနဲ့ အမြင့်ဆုံး အဆင့်ကို ရောက်အောင် ကြိုးစားချင်တာက သဘာဝပဲလေ။ သူတို့ အားလုံးက ပြိုင်ပွဲကို အကောင်းဆုံး စတင်လိုက်ကြပြီလေ။”
“တိုက်စစ်မှူး တစ်ယောက် အနေနဲ့ ပြိုင်ပွဲ အစောပိုင်းမှာတင် ဂိုးပေါက်ရှာတွေ့ချင်တာ အမှန်ပဲ။ ဒါကြောင့် စိတ်ထဲမှာတော့ ဒီလို ပြိုင်ဆိုင်မှုတွေ ရှိနေတာက ကျွန်တော့်ရဲ့ အရည်အသွေးကို ပိုပြီး မြှင့်တင်ဖို့ အများကြီး အထောက်အကူ ဖြစ်စေပါတယ်။ ကမ္ဘာ့ဖလား ဆိုတာလည်း ဒီလို ထိပ်တန်း ကစားသမားတွေ အမြင့်ဆုံး အဆင့်မှာ ခြေစွမ်းပြဖို့ပဲ မဟုတ်လား။ ဒါကြောင့် ကျွန်တော့်အနေနဲ့ အခုလို နှစ်ဂိုး သွင်းနိုင်ခဲ့တာ တကယ်ကို ဝမ်းသာပါတယ်။” လို့ ကိန်းက ဆိုပါတယ်။
အင်္ဂလန် အသင်းဟာ ကမ္ဘာ့ဖလား သမိုင်းတစ်လျှောက် (၁၇) ကြိမ်မြောက် ပါဝင်ယှဉ်ပြိုင်မှုမှာ ပထမဆုံးအကြိမ် အဖြစ် သုံးကြိမ် ဆက်တိုက် ပွဲဦးထွက် ပွဲစဉ်ကို အနိုင်ရရှိခဲ့တာလည်း ဖြစ်ပါတယ်။ လက်ရှိ မှာတော့ အင်္ဂလန် အသင်းသားတွေ အားလုံး ပွဲကစားချင်စိတ်တွေ ပြင်းပြနေပြီး လာမယ့် အင်္ဂါနေ့ ဘော့စတွန်ကွင်းမှာ ဂါနာ အသင်းနဲ့ အုပ်စု ဒုတိယ ပွဲစဉ် ယှဉ်ပြိုင်ရမှာ ဖြစ်သလို၊ အဲဒီနောက် လေးရက် အကြာမှာတော့ ပါနားမား အသင်းနဲ့ အုပ်စု နောက်ဆုံး ပွဲစဉ် ကစားရမှာ ဖြစ်ပါတယ်။
“ကျွန်တော်တို့ ပွဲကစားရဖို့ တော်တော်ကြာအောင် စောင့်ခဲ့ရတာပါ။ ခြောက်ရက်လောက် စောင့်ခဲ့ရတာ ဆိုတော့ အသင်းက လူတိုင်း ကွင်းထဲဆင်းပြီး ကစားချင်လို့ မနေနိုင် မထိုင်နိုင် ဖြစ်နေကြပါပြီ။” လို့ ဟယ်ရီကိန်းက အသင်းရဲ့ စိတ်အားထက်သန်မှုကို ဖြည့်စွက် ပြောကြားသွားခဲ့ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
